كان عامر يركض في الجامعة متجها ً إلى كلية التجارة وأعين الجميع عليه فقد كان يركض بسرعة مذهلة دخل إلى الكلية نظر بحركة سريعة إلى الساعة
عامر : أتأخرت شو بدو يفوتني هس عندو
وقف عامر بجانب باب المحاضرة وكانت ملامحه أقرب للمضحكة من الحزينة فقد كان يضع على الأرض الحقيبة كمتسولة تنتظر حسنة لأبنتها الصغيرة
جاء فايز ووليد أصحاب عامر تضاحك فايز وتمايل من ثقل ضحكته وقال لوليد : مش حكيتلك ببيعناش عامر وبفوت عالمحاضره
عامر : كيف بدي أفوت متأخر شو ناسيين أخر مره شو عمل
فايز : لا منسيتش
وليد : نيالك يا زلمه عمل محاضره مشانك وانشهرت بين كل الطلاب
عامر : وليد مش ناقصك أنت مجمع علامات ورصيدك عندو بتحكي في دولي
وليد : بدينا انق ليش ما درست عالامتحان
عامر : نعم ولك مش قبل الأمتحان دقيت عاصدرك وحكيتلي وصلتك الورقة وركنت عليك ورحت عرام الله
وليد : اه بس يا عامر يومها أنا ما قصرت وبتعرف مين الي كان يراقب علينا الدكتور بلال وبتعرف مين الدكتور بلال (الدكتور بلال من أشد المراقبين في الامتحانات ويعتقد بأنه كان مع المفتشين الدوليين في العراق ) ويومها تقول في تهريب سلاح بينا مكانش ناقص إلا يجيب كلب مشان يشمنا
فايز : شباب خلص سكرو عالموضوع شو بدنا نعمل اليوم مناقشة البحث
عامر : نفوت صعب خلونا نروح عالكفتيريا نشرب أي شي وبعد ما تخلص هالمحاضره بنروحلو وبنترجاه
وليد : اوك حلوه هاي نترجاه
فايز : خلص لعاد عالكفتيريا شباب
وصلوا إلى الكفتيريا وجلسوا على طاولتهم التي هي بجانب المدخل
عامر : حسين 3 قهوة سادة
حسين : ما بتطلب السادة إلا تكون في مصيبة شو كنو الإنذار تعلق
عامر : حسين عمرك شفت وجهك بنقط قهوة
حسين : خلص خلص شكلك معصب
وليد : عامر مالك يازلمه حسين من عظم الرقبة
عامر : يازلمة مش فاضي لثقلة دمو مش سامعو مثل البومه شو بحكى كنو الإنذار تعلق
دخلت إلى الكفتيريا 3 فتيات جميلات جلسن على مقربة من طاولتهم
عامر : حسين تعال شوي
حسين : شو بدك
عامر : قرب مين هالبنات الحلوات إلي قاعدات بحدنا
حسين : بديش احكيلك
عامر : حبيبي يا حسين خذلك هالسيجارة
حسين : شو يا كبير من وينتا دفدوف الله يرحم أيامو العربي
عامر : الغالي للغالي اه يا حسين مين هالبنات
حسين : البنت الي لابسة جلباب روعه اسمها والبنتين الي لابسات جينز لبلوزتها حمرة أسمها جمانه
عامر : يا زلمه الثنتين لابسات بلايز حمر
حسين : مالنا يا عامر بلشنا نخربط مابين البلايز والقمصان الي لابسة قميص أسمها ندى الثلاث سنه ثانية حقوق
عامر : مشكور حسين طير
حسين : بتمون يا سيدي
عامر : شباب وين كاينين أحنا وهيك ناس عنا
وليد : كنا بندرس
فايز : بجوز كنا في المحاضرات
عامر : لا عن جد يا شباب وين كاينين أحنا عنهن
وليد : شباب خلونا نروح عند الدكتور بلاش نحمل المادة بعدين بنحب وين يدهن يرحن
عامر : بجوز يتخرجن
وليد : لا بتخرجنش بهالساعة
عامر : يلا فايز
فايز : روحو انا هيني وراكم
عامر : فايز بديش أعصب وصير أنط زي المجنون قوم يلا
فايز : هههه بعرفك مجنون وبتعملها
خرجوا من الكفتيريا وهم يحلمون في الحسناوات خرجوا وقد أوصو حسين أن يراقبهن ويرى فيما إذا كان هناك طلاب على علاقة مع الفتيات . وصلوا إلى مكتب الدكتور ناهض ( الدكتور ناهض يبلغ من العمر 70 عاما ً يملك لسانا بطول مترين )
الدكتور ناهض : أهلا وسهلا بالشباب وين هالغيبة تفضلوا
عامر : الله يزيد فضلك يا دكتور
وليد : دكتور متأسفين اليوم ما أجينا على مناقشة الأبحاث
الدكتور ناهض : ليش تيجو يا شباب وتغلبو حالكم خيرها بغيرها السنه الجاي بنتناقش وبندردش ليش نستعجل
فايز : له له يا دكتور بدنا نتخرج
الدكتور ناهض : ليش تتخرجو ما في شغل خليكو عندي عشان تونسوني
عامر : دكتور بدنا نروح عالامارات وصرنا مراسلين شركات وظايل نتخرج ونوخذ الشهادات
الدكتور ناهض : راسلتو شركات
وليد : اه دكتور راسلنا كثير شركات
الدكتور ناهض : وين عالفيس بوك , أسمعو هالماده حاملينها اتعبوش حالكم ارجعو اعملو مرسلاتكم وأجلو الموعد فصل تا تعيدو الماده
وبعد تدخل الوسطاء وعميد الكلية وبعض الطلاب الذين لهم ثقل في المجلس قبل الدكتور ناهض بأن يناقشوا الأبحاث قبل بدء الأمتحانات النهائية
خرج عامر وفايز ووليد من الكلية وكانوا سعداء بقبول الدكتور ناهض بتأجيل مناقشة الأبحاث معهم
عامر : شباب صحيح خلونا نروح عالكفتيريا نشوف البنات وننسى وجه ناهض
وليد : أه والله
فايز : بتعرفو يا شباب
عامر ووليد : شو
فايز : ناهض مثل ناموس أريحا لثنين إذا بيجوك بالليل بسهروك
عامر : بس ناهض قبل مايسهرك برعبك
فايز : طيب خلونا نروح عالكفتيريا قبل ما يطلعن
وصلوا إلى الكفتيريا ونظروا إلى الطاولة التي كانت عليها الفتيات كان هناك شاب يدرس
عامر : ملناش إلا حسين
فايز : اها بس وينو مش مبين
وليد : حدا معو رقمو
عامر : أنا
وليد : طيب أتصل عليه
عامر : أوك
فايز : يا زلمه مالو بردش
عامر : مهو لازم كل الي حوالين حسين يعرفو أنو أجا أتصال , ألو حسين
حسين : ألو مين معي
عامر : مين غيري أي في حدا غيري معو رقمك منت أهلك معطيتهمش رقمك من خوف يرنو ويفصلو وتخسر لما ترجعلهم أنا عامر
حسين : مين عامر
عامر : لا حول ولا قوة إلا بالله , عمرك شفت القهوه بتنقط عاوجهك
حسين : اها أهلين عامر
عامر : حسين البنات الي وصيناك عليهن وين رحن
حسين : عامر أعمل دليت للبنات وعمل سيرش عاغيرهن
عامر : شو يا كبير صاير تحكي لغات , شو في أحكي من الأخر
حسين : البنات محجوزات
عامر : لمين
حسين : ما غيرهم
عامر : قصدك
حسين : اه وما تحكي أسماء البلفون مراقب
عامر : طيب يا حسين مشكور
حسين : عامر إن صار ما صار وصارت مشكله أمسح رقمي
عامر : من البلفون ولا من الشريحه
حسين : من لثنين وياريت تغير خط الكفتيريا
عامر : باي
حسين : طوط طوط
وليد : شو عامر
عامر : شكلو ناهض جاي الليله علينا نامو بعد ما تروحو من الجامعه بلا من نومة هالليله
وليد : شوفي
عامر : مش حكيتلك حسين بومه ما صدقت
وليد : ليش شو حكى

يتبع