زرعنا لَوْ.. طِلْعَت يا ريت/ بقلم:سيمون عيلوطي
بتمنّى زهرة
نيســان
عَ البسمِه تْزهّر
نوّار
وتْصير بْقلبي
ألــــحان
ترافقني
بْأحلى مشوار
يمكن نسمات
البستان
تحمل جنحان
الكنـــار
بَلْكي تتماوج
ألـــوان
قُدّامي
مثل الأزهــــار..؟!
***
قطـرات النّدى
بتهــــف
بتخايلها
عَ الوردات
والعصفورة
تيجي تْرف
تْوشوشني
أحلى هَمسـات
عن نبعتنا قَبْل تْجف
وعن شـمسـتنا
والفيّات
عا ساحتنا
كيف تْهِــف:
أتذكّرها
ليــــل نْهــار
****
عا غَناني العصـافـير
دغشِه
مع طلات النّور
نتزل جــارتنا
بكّــــير
حول البير
تْصير تْدور
تلقاني بريشِة
تصـوير
أرسـم طيـاره
وشختـور
تَ نْسافر فيهن
ونطير
والجّـاره تحكـي
للجّـار
****
يا عيني عا هالأيّـــــام
فيها فرحتنا
بتْـدوم؟!!..
وللا هي وعْد
وْأوهام
عــا شــبر ميّـه
بتعـوم؟؟..
لو مرّه يْفـــل الظّـــلام
عن دربي
ترحل لِغْيوم
والفرحه مَ تكون احلام
تنمنـاها زْغــــار
كْبــار!!
(الناصرة) 19/5/2012
* زرعنا لَوْ.. طِلْعَت يا ريت: مثل شعبي معروف*
(كتبت هذه المقطوعة اثر حوار دار بين الشاعر والمطربة القديرة دلال أبو آمنة حول اغنية الفرح)
موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع على العنوان: alarab@alarab.net
|
| انضم الى مجموعة موقع العرب على جوجل |
